پنجاب سینٹرل بزنس ڈسٹرکٹ ڈیولپمنٹ اتھارٹی (پی سی بی ڈی ڈی اے)، جسے ‘سینٹرل بزنس ڈسٹرکٹ پنجاب’ (سی بی ڈی پنجاب) کے نام سے بھی جانا جاتا ہے، معیاری انفراسٹرکچر، وقت پر تکمیل اور عوامی تحفظ کو ترجیح دیتے ہوئے اپنے ترقیاتی منصوبوں کو تیزی سے آگے بڑھا رہا ہے۔ اسی عزم کے تحت، سی ای او سی بی ڈی پنجاب عمران امین نے تعمیراتی پیش رفت، آپریشنل تیاریوں اور جاری مون سون کے سیزن کے پیش نظر کیے گئے حفاظتی اقدامات کا جائزہ لینے کے لیے اتھارٹی کے اہم زیرِ تعمیر منصوبوں کا تفصیلی دورہ کیا۔
اس دورے کے دوران سی ای او سی بی ڈی پنجاب نے سی بی ڈی ورٹیکس، سی بی ڈی روٹ، سی بی ڈی واک اور پاکستان کی پہلی اور سب سے بڑی آئی ٹی سٹی سی بی ڈی این ایس آئی ٹی سٹی کا دورہ کیا۔
اس موقع پر ان کے ہمراہ ایگزیکٹو ڈائریکٹر ٹیکنیکل ریاض حسین، ڈائریکٹر پروجیکٹ مینجمنٹ آصف اقبال، ڈائریکٹر کنسٹرکشن آصف بابر، ڈائریکٹر انجینئرنگ عمر حیات، پروجیکٹ مینیجر سی بی ڈی این ایس آئی ٹی سٹی یاسر سیف اللہ، نیسپاک کے حکام اور پروجیکٹ کنٹریکٹرز بھی موجود تھے۔
دورے کا ایک اہم مقصد مون سون کی تیاریوں کا جائزہ تھا۔ سی ای او سی بی ڈی پنجاب عمران امین نے انجینئرنگ ٹیموں، کنسلٹنٹس اور کنٹریکٹرز کی انتھک کاوشوں کو سراہا، جن کی بدولت ایک جدید انفراسٹرکچر اور ڈرینیج سسٹم قائم کیا گیا جس نے 263 ملی میٹر کی ریکارڈ بارش کا کاملیت سے مقابلہ کیا۔ جہاں لاہور کے کئی بڑے علاقوں میں شدید جل تھل اور پانی جمع ہونے کی صورتحال دیکھی گئی، وہیں سی بی ڈی روٹ 47 مکمل طور پر فعال اور ٹریفک کے لیے بحال رہا، جو اتھارٹی کے اعلیٰ انجینئرنگ معیار اور پیشگی حفاظتی اقدامات کا منہ بولتا ثبوت ہے۔
قصور میں بارش کا جمع پانی دو معصوم بچوں کی جان لے گیا
سی ای او نے عمارت کے بیرونی حصوں پر ٹائلز کی تنصیب اور ایپوکسی فلورنگ سمیت حتمی کاموں کا جائزہ لیا اور پروجیکٹ ٹیم کو ہدایت کی کہ کام کی اعلیٰ کیفیت کو برقرار رکھتے ہوئے بروقت تکمیل کو یقینی بنایا جائے۔
این ایس آئی ٹی سٹی کے دورے دوران سی ای او سی بی ڈی پنجاب نے کنٹریکٹرز کو ترقیاتی کاموں کی رفتار مزید تیز کرنے کی ہدایت کی۔ بریفنگ میں بتایا گیا کہ مرکزی پارک اور پبلک ریلم کا کام منصوبے کے مطابق جاری ہے، مرکزی داخلہ گیٹ کے ستونوں کی تعمیر پر کام ہو رہا ہے اور مرکزی انٹری پیچ پر اسفالٹ کا کام کامیابی سے مکمل کر لیا گیا ہے۔
سی ای او سی بی ڈی پنجاب عمران امین نے اس بات پر زور دیا کہ سی بی ڈی این ایس آئی ٹی سٹی پر کام کرنے والے تمام کنٹریکٹرز تعمیراتی معیار میں مکمل ہم آہنگی اور یکسانیت برقرار رکھیں۔ انہوں نے پروجیکٹ ٹیموں کو مزید ہدایت کی کہ پورے منصوبے میں گرین اسپیسز (سبزہ زاروں) میں اضافہ کیا جائے اور مون سون کے باعث پیش آنے والے خلل کو کم سے کم کرنے کے لیے کام کے اوقات کار کی مناسب منصوبہ بندی کی جائے، تاکہ لیبر کی حفاظت اور پیداوری صلاحیت دونوں یقینی بن سکیں۔
سی ای او سی بی ڈی پنجاب عمران امین نے اس موقع پر گفتگو کرتے ہوئے کہا کہ “ہمارا مقصد نہ صرف عالمی معیار کا انفراسٹرکچر فراہم کرنا ہے بلکہ یہ یقینی بنانا بھی ہے کہ یہ سخت ترین حالات میں بھی اپنی افادیت برقرار رکھے۔ لاہور میں مون سون کی شدید ترین بارشوں کے دوران سی بی ڈی روٹ 47 کی کامیاب آپریشنل صورتحال ہماری پائیدار انجینئرنگ، معیاری تعمیر اور جدید شہری ترقی کا ثبوت ہے۔ ہم سیکیورٹی، ماحولیاتی تحفظ اور بہترین تعمیراتی معیار کو برقرار رکھتے ہوئے وقت پر تمام منصوبوں کی تکمیل کے لیے ہر پروجیکٹ کی مسلسل نگرانی جاری رکھیں گے۔”
سی بی ڈی پنجاب ایسے انقلابی انفراسٹرکچر کی فراہمی کے لیے پرعزم ہے جو معاشی نمو میں معاون ثابت ہو، پائیدار شہری نظام کو فروغ دے اور پورے پنجاب میں جدید شہری ترقی کے بین الاقوامی معیار قائم کرے۔
