بونس کی لالچ میں واپڈا حکام نے شہریوں کو خطرات کے سامنے لا کھڑا کیا

ضلع بھر میں ایک طرف بدامنی اور چوریوں کی بڑھتی ہوئی وارداتوں نے شہریوں کی نیندیں حرام کر رکھی ہیں، تو دوسری جانب واپڈا کے ایس ڈی او ٹانک ون نے مبینہ طور پر اپنے ذاتی فائدے، بونس اور پروموشن کے حصول کے لیے عوام کی جانوں کو مزید خطرے میں ڈال دیا ہے۔

باوثوق ذرائع کے مطابق ایس ڈی او نے شہری فیڈرز پر لوڈشیڈنگ کا دورانیہ بڑھانے کی درخواست پی ڈی سی کو ارسال کی، تاہم پی ڈی سی نے یہ کہہ کر درخواست مسترد کردی کہ زیادہ لوڈشیڈنگ سے ٹانک کی پہلے سے خراب امن و امان کی صورتحال مزید بگڑ سکتی ہے، لہٰذا موجودہ شیڈول برقرار رکھا جائے۔

ذرائع کا کہنا ہے کہ متعلقہ افسر نے اس فیصلے کو پس پشت ڈال کر مبینہ طور پر فیڈرز کے اڈے کاٹ دیے اور رات بھر بجلی بند رکھ کر پی ڈی سی کے احکامات کی کھلم کھلا خلاف ورزی کی، جس سے چوروں اور دہشت گرد عناصر کو آسان راستے میسر آگئے۔

اس اقدام سے شہری شدید پریشانی، خوف اور غم و غصے کا شکار ہیں۔ رات بھر کی لوڈشیڈنگ کے باعث ڈسٹرکٹ ہیڈکوارٹر ہسپتال بھی تاریکی میں ڈوبا رہا اور مریضوں کو سخت مشکلات کا سامنا کرنا پڑا.عوام نے پیسکو چیف سمیت دیگر اعلی حکام سے مطالبہ کیا ہے کہ واپڈا حکام کو کنٹرول میں رکھا جائے، بصورتِ دیگر احتجاج کیا جائے گا اور اس کے نتائج کی تمام تر ذمہ داری واپڈا پر عائد ہوگی۔