داژو، چین – پاکستان نے انڈر-18 ہاکی ایشیا کپ کے سیمی فائنل میں جگہ بنا لی ہے، جہاں انہوں نے گروپ میچ میں بنگلہ دیش کو 3-6 سے شکست دے کر شاندار کارکردگی کا مظاہرہ کیا۔
چین کے شہر داژو میں کھیلے گئے اس مقابلے میں پاکستان نے زبردست کھیل پیش کرتے ہوئے گروپ میں پہلی پوزیشن حاصل کر لی۔
پاکستان کی جانب سے عبداللہ اعوان اور علی ہنزالہ نے دو، دو گول کیے، جبکہ عاصم حیدر اور عاطف علی نے ایک، ایک گول کیا۔ بنگلہ دیش کی طرف سے اسماعیل حسین نے دو اور دین الاسلام نے ایک گول اسکور کیا۔
پاکستان اب اپنا چوتھا اور آخری گروپ میچ 9 جولائی کو چین کے خلاف کھیلے گا، جس میں وہ ٹورنامنٹ میں اپنی کامیابیوں کا سلسلہ جاری رکھنے کے لیے پُرعزم ہے۔
اس سے ایک روز قبل قومی ٹیم نے سری لنکا کو 0-9 سے شکست دے کر دوسری فتح حاصل کی تھی، جب کہ افتتاحی میچ میں ہانگ کانگ چائنا کو 0-8 سے ہرا کر شاندار آغاز کیا تھا۔
سری لنکا کے خلاف میچ میں پاکستان نے آغاز سے ہی دباؤ قائم رکھا اور پہلے ہاف میں ہی 0-6 کی برتری حاصل کر لی۔
اس میچ میں عاصم حیدر نے شاندار ہیٹ ٹرک کی، عاطف علی اور عدیل نے دو، دو گول کیے، جب کہ عبداللہ اعوان اور زبیر لطیف نے ایک، ایک گول کے ساتھ فتح کو مکمل کیا۔
پاکستان کی اب تک کی کارکردگی ایشیا کپ میں اس کی مضبوط فارم کی عکاسی کرتی ہے۔
