تمام اسسٹنٹ کمشنرز مشینری سمیت فیلڈ میں، نشیبی علاقوں سے پانی کی فوری نکاسی کو یقینی بنانے کا حکم
شہریوں کی مشکلات کا فوری ازالہ اولین ترجیح، انتظامیہ کی مکمل تیاری اور چوکنا رہنے کی یقین دہانی
پنجاب میں فری لانسرز کیلئے انٹرنیشنل سرٹیفکیشن پروگرام
ڈپٹی کمشنر لاہور سید موسیٰ رضا کی فعال قیادت میں ضلعی انتظامیہ لاہور نے مون سون سیزن کے چیلنجز سے نمٹنے کے لیے ایک جامع اور مربوط حکمت عملی پر عملدرآمد شروع کر دیا ہے، جس کا مقصد شہریوں کو بارشوں کے دوران کسی بھی قسم کی تکلیف سے محفوظ رکھنا ہے۔ حالیہ بارش کے فوری بعد، ڈپٹی کمشنر کی ہدایت پر تمام اسسٹنٹ کمشنرز سمیت ضلعی انتظامیہ اور واسا کا تمام فیلڈ عملہ مشینری کے ہمراہ متحرک ہو گیا تاکہ نکاسی آب کے عمل کو بلا تعطل جاری رکھا جا سکے۔ ڈی سی سید موسیٰ رضا نے واضح ہدایات جاری کیں کہ تمام نشیبی علاقوں سے پانی کی فوری نکاسی کو ترجیحی بنیادوں پر یقینی بنایا جائے اور علاقوں کی بروقت کلیئرنس میں کوئی کوتاہی نہ برتی جائے۔ انتظامیہ کی جانب سے شہریوں کی حفاظت کو یقینی بنانے کے لیے احتیاطی تدابیر بھی جاری کی گئی ہیں، جن میں بارش کے دوران غیر ضروری سفر سے گریز کرنے اور بجلی کے کھمبوں اور تاروں سے دور رہنے کی تاکید شامل ہے۔ یہ فوری اور منظم ردعمل ضلعی انتظامیہ کی مون سون کے لیے مکمل تیاری اور شہریوں کے جان و مال کے تحفظ کے لیے اس کے غیر متزلزل عزم کی عکاسی کرتا ہے۔
