ٹرمپ کا بڑا اعلان: کینیڈا سے درآمدات پر 35 فیصد ٹیکس عائد کرنے کا فیصلہ
امریکی صدر ڈونلڈ ٹرمپ نے گزشتہ شب کینیڈا سے امریکہ آنے والی مصنوعات پر 35 فیصد درآمدی ٹیکس عائد کرنے کا اعلان کر دیا۔ یہ ٹیکس یکم اگست 2025 سے نافذ العمل ہوگا اور تمام شعبہ جاتی محصولات سے ہٹ کر اضافی چارج کے طور پر وصول کیا جائے گا۔
نجی ٹی وی ایکسپریس نیوز کے مطابق، صدر ٹرمپ نے سوشل میڈیا پر جاری اپنے بیان میں کہا کہ اس نئے اقدام کا مقصد امریکی صنعت و معیشت کو تحفظ دینا ہے۔ انہوں نے مزید کہا کہ یہ ٹیکس کینیڈا سمیت اُن تمام ممالک پر لاگو ہوگا جن کے ساتھ امریکہ کا باقاعدہ تجارتی معاہدہ نہیں ہوا۔
امریکی نیوز چینل کی رپورٹ کے مطابق، ایک انٹرویو میں صدر ٹرمپ نے واضح کیا کہ وہ دیگر ممالک کے لیے بھی عمومی درآمدی ٹیکس کی شرح متعارف کرانے کا ارادہ رکھتے ہیں، جو 15 سے 20 فیصد کے درمیان ہو سکتی ہے۔ انہوں نے کہا کہ اب وقت آ گیا ہے کہ تمام ممالک منصفانہ تجارتی اصولوں پر عمل کریں۔
واضح رہے کہ صدر ٹرمپ اس ہفتے 20 سے زائد ممالک کو خطوط ارسال کر چکے ہیں، جن میں انہیں خبردار کیا گیا ہے کہ اگر یکم اگست 2025 تک تجارتی معاہدے نہ ہو سکے تو ان کی مصنوعات پر بھی اسی طرز کے محصولات لاگو کر دیے جائیں گے۔
